Apadriñamentos Lectores

 

No Día dos Apadriñamentos Lectores recibimos a visita dos nenos e nenas do IES Marco do Camballón, que compartiron con Infantil diferentes contos e historias cheas de maxia e imaxinación.

Despois da lectura, realizamos un obradoiro no que recreamos un bosque de conto. As árbores recollían, a través de imaxes, títulos e emocións, todo aquilo que nos transmitiron os contos escoitados.

Foi unha xornada moi especial de convivencia e aprendizaxe compartida, na que a lectura nos uniu para crear, sentir e imaxinar xuntos

Día do Libro

 Para celebrar o Día do Libro, os nenos e nenas trouxeron ao colexio as súas lecturas favoritas e realizouse unha exposición na entrada do centro.

Grazas a esta actividade, puidemos coñecer os gustos lectores de cada un, compartir recomendacións e fomentar o diálogo arredor dos libros e da lectura.

Foi unha experiencia moi enriquecedora na que os libros se converteron nun punto de encontro para aprender, conversar e desfruta xunto

s.

📖 VISITA DOS AUTORES: Antón e a moura do lameiro de Viana

 No noso colexio tivemos o pracer de recibir a visita de Xoán Carlos Porrúa e Santiago Gómez Fuentes, autores do libro Antón e a moura do lameiro de Viana.

Durante o encontro, achegáronnos ao fascinante mundo das lendas, compartindo con nós historias da nosa contorna que espertaron a curiosidade e a imaxinación do alumnado. Ademais, déronnos a coñecer unha páxina web na que se van recompilando e rexistrando todas as lendas da nosa zona, poñendo en valor o noso patrimonio cultural.

A actividade rematou cun divertido xogo baseado no libro, no que o alumnado tivo que superar diferentes retos e descubrir segredos ocultos, participando de maneira activa e colaborativa.

Foi unha experiencia moi enriquecedora que nos permitiu gozar da literatura dun xeito dinámico e próximo.

Queremos agradecer a Xoán Carlos Porrúa e Santiago Gómez Fuentes a súa visita e o tempo compartido con nós.

🎨 ACTIVIDADE DE MARMORADO CON @peixesapop

 No noso colexio tivemos a sorte de participar nunha actividade creativa moi especial da man de @peixesapop, na que descubrimos a técnica do marmorado, dentro do programa biblioteca creativa.

Durante o obradoiro, o alumnado puido experimentar cunha forma de expresión artística diferente, xogando coas cores e creando efectos únicos sobre a auga. A través desta técnica, cada participante elaborou o seu propio deseño, deixando voar a imaxinación e explorando combinacións sorprendentes.

A actividade consistiu en realizar a imprimación sobre estoxos, que posteriormente foron decorados mediante o marmorado. O resultado foi espectacular: cada estoxo converteuse nunha peza única, chea de cor e personalidade.

Ademais de fomentar a creatividade, esta experiencia permitiunos traballar a concentración, a paciencia e o gusto polo traballo manual. Sen dúbida, foi unha xornada diferente e moi enriquecedora para todo o alumnado.

Gracias @peixesapop por vir e por achegarnos esta técnica artística tan orixinal.

🎙️ RADIO NA BIBLIO: unha experiencia para escoitar e contar

 Na nosa biblioteca escolar vivimos unha xornada moi especial arredor da radio, na que participaron os nenos e nenas de infantil e do 1º ciclo.

Da man de Javier e Carmen, de Amorodio, o alumnado achegouse ao mundo da radio dunha forma sinxela e moi lúdica. Ao longo da actividade, tiveron a oportunidade de crear o seu propio pequeno programa radiofónico, converténdose en auténticos locutores e locutoras.

Durante a sesión, cantaron, responderon preguntas, inventaron unha pequena entrevista e mesmo se atreveron a contar algunha “mentiriña”, enchendo a Radio Piloño nun espazo de risas e imaxinación.

Foi unha experiencia moi enriquecedora, na que ademais de divertirse, desenvolveron habilidades de expresión oral, escoita activa e creatividade.

Queremos agradecer a Javier e Carmen de Amorodio por achegar a radio ao noso alumnado dun xeito tan próximo e divertido.

Día da Muller Traballadora

 

Con motivo do Día da Muller Traballadora, no colexio realizamos un emotivo tendal de fotografías para render homenaxe a todas as mulleres das nosas familias e da nosa contorna, recoñecendo toda unha vida de traballo, esforzo e dedicación.

As imaxes, aportadas polo alumnado, permitíronnos compartir lembranzas, historias e exemplos de superación que forman parte da nosa vida cotiá.

Grazas a todas as familias pola súa colaboración nesta
actividade tan especial.

DIA DE ROSALÍA

 O 23 de Febreiro celebramos o día de Rosalía e traballamos no cole os distintos "Poemas a Rosalía", despois expuxémolos na entrada simulando a súa habitación coa cama e o resultado foi maravilloso.